NEWS>>> Unapohisi Umechoshwa na Ndoa Yako.

Habari ya mapumziko ya weekend wanajamii,siyo mbaya tukishirikishana hili linaweza kupunguza michepuko ili njia kuu ibaki kuwa salama,turudi katika maada.


Kabla hamjaoana, wewe na mwenzi wako mlifurahia kufanya mambo mengi pamoja. Lakini sasa, kuna kizuizi kati yenu, hivyo mnahisi mko katika kifungo cha jela badala ya kufurahia ndoa.
Mnaweza kuboresha uhusiano wenu. Lakini kwanza, chunguza mambo yanayoweza kufanya uchoshwe na ndoa yako,yafuatayo yanaweza kuwa kati ya mambo yanaweza kukufanya uchoshwe na ndoa
Unaanza kuona ukweli wa mambo.
Shughuli za kila siku kama vile kazi, kulea watoto, na kushughulika na watu wa ukoo zinaweza kuvuruga furaha ya ndoa hatua kwa hatua. Isitoshe, mambo yasiyotazamiwa kama vile matatizo ya kifedha au kutunza mmoja wa familia mwenye ugonjwa wa kudumu yanaweza kuleta mkazo kwenye ndoa.
Mnashindwa kupatana. 
Watu wanapochumbiana hawatilii maanani tofauti zao. Lakini baada ya kuoana, wanatambua kwamba wanatofautiana sana katika mambo kama vile kuwasiliana, kupangia matumizi ya pesa, na kusuluhisha matatizo. Sasa wanashindwa kabisa kuvumilia tofauti ambazo mwanzoni hazikuwaudhi sana.
Hujali hisia za mwenzako. 
Baada ya muda, maneno au matendo ya kuumiza na mizozano ambayo haijasuluhishwa inaweza kusababisha mume au mke aache kueleza hisia zake au hata aanzishe urafiki wa karibu na mtu mwingine(michepuo hapa huanza).
Matarajio yenu hayakuwa halisi. 
Watu fulani huingia kwenye ndoa wakiamini kwamba wamempata mwenzi anayewafaa kabisa. Ingawa huenda hilo likaonekana kuwa jambo linalochochea upendo, linaweza kukuvunja moyo baadaye. Matatizo yanapotokea, wazo la kwamba mlifaana kikamili linatoweka, na kuwaacha mkihisi kwamba mlikosea kuoana.
Ufanye nini unahisi kuchoshwa na ndoa yako?
Zingatia sifa nzuri za mwenzi wako. 
Jaribu kufanya hivi: Orodhesha sifa tatu nzuri za mwenzi wako. Iweke orodha hiyo karibu nawe, labda nyuma ya picha ya harusi au kwenye simu ya mkononi. Iangalie orodha hiyo mara kwa mara ili ukumbuke sababu iliyokufanya uvutiwe naye. Kuzingatia sifa nzuri za mwenzi wako kutasitawisha amani na kukusaidia uvumilie tofauti zenu.
Pangeni muda wa kuwa pamoja. 
Kabla hamjaoana, bila shaka mlipanga muda wa kufanya mambo pamoja. Mlifurahia kusitawisha urafiki, lakini ilihitaji jitihada. Kwa nini msifanye hivyo sasa? Panga muda wa kipekee ambao wewe na mwenzi wako mnaweza kuwa pamoja, kama ilivyokuwa wakati wa uchumba. Kufanya hivyo kutaimarisha uhusiano wenu na kuwawezesha kukabiliana na matatizo yasiyotarajiwa
Zungumzia hisia zako. 

Ikiwa umeumizwa na maneno au matendo ya mwenzi wako, je, unaweza kumsamehe? Ikiwa huwezi, usiamue kumnyamazia tu. Ongea na mwenzi wako kwa utulivu bila kukawia, ikiwezekana siku hiyohiyo(kununa au kususa haisaidii).
Uwe na matarajio halisi
Mkipatwa na dhiki,misukosuko ya kifamalia msiamue haraka-haraka kwamba mlikosea kuoana. Badala yake, shirikiana na mwenzi wako kutatua matatizo na mwendelee “kuvumiliana na kusameheana kwa hiari.
Ishi kulingana na nadhiri yako ya ndoa

Je, unakumbuka maneno ya nadhiri yako ya ndoa? Kwa nini usiyatafakari tena na ujiulize: ‘Je, ninatimiza ahadi yangu?’ Usifikirie sana jinsi mwenzi wako anavyotimiza nadhiri yake. Nadhiri yako ilikuwa na maneno ambayo wewe ulisema ungefanya. Ikiwa kila mmoja wenu atazingatia kutimiza nadhiri yake, inaelekea kwamba nyote mtafurahia matokeo,hapa kwenye ahadi wengi wameweka kama fashioni tu na sisi watazamaji unapokuwa unasema yale maneno tunaamini kuwa huyo ndo umemchagua na ulikuwa makini katika hilo, tuishi kulingana na nadhiri zetu na ndoa zitadumu

****************************** *************
Karibuni kwa michango zaidi

Ni kwa neema tu...................!